ولا يوم من أيامك يا بلدي ولا يوم
على صوت الادان بنصحى كل يوم
ولا ساعة العصاري ويّا ثومه ع القهوة
مشروب وإتنين ومش عاوز تقوم
..........................................................
ولاَّ مطبخ جنب منِّي جاية منه ريحة الفتة بالخل والتوم
ويجيني الأسطى حمام يحلف عليا ميت يمين
معاه ع الغدا لازم أقوم
..........................................................
ولا أشوف بنات أمارة بملاية لف يطيروا من عيوني النوم
وأشوف شباب عدالة متهندمة جوه الهدوم
ولا .. طفل صغير ويّا جده بيجيب له حلاوة كل يوم
..........................................................
ولا يوم من أيامك يا بلدي ولا يوم
للاسف انا لازلت هنا ولم اسافر لانى اعانى من انفلونزا شديدة جدا وللي بيعرف ان مرضى ارتفاع الضغط والقلب ان الانفلونزا بتكون قاتلة لعدم تمكنى من اخد ادوية لها غير الفيتا سيد او أي فيتامين سي وانا من النوع اللي بيضعف قوي قدامها (الانقلونزا طبعا) وبصراحة انا من النوع اللي بيحب يرفه نفسه مش برضة (إن لبدنك عليك حق ) فبامر الله هايكون السفر يوم السبت القادم والبوست ده قديم شويتين بس لاقيتني وانا فالفراش باردده فحبيت اقوله لكم
أنا مسافر وحامل في ايدي شنطة سفر
أنا مسافر وحامل في قلبي حكاية عمر
الغربه طريقي...
والليل رفيقي....
واغلي أصحابي ضي القمر
ماشي بروحي..
نعاني في جروحي....
وأحلي عذابي طول السهر
أنا مسافر وحامل في ايدي شنطة سفر
أنا مسافر وحامل في قلبي حكاية عمر
كيفك يا أمي..
كيفك يا بوي..
كيفكم يا خواتي كيف الخبر
ردوا عليا...
جوابكم هدية...
بيجيبلي معاه نسمة بحر
أغنية الفنان الليبي ناصر المزداوي وهي ابلغ تعبير عما انا به
ومش هاقول لكم كم بكيت من غير ارادة لفراقي لارضي ووطنى
واقسم بالله لم يخطر ببالي وانا اؤؤكد حجزي غير اني نبتة تنزع من جذورها .... بجد البلد دي اجمل ما خلق لنا الله لكن للاسف فيها من يحاول ان يجعلنا نكفر بها لكنى للاسف اعلم ذلك ولن اكفر بها او اسيء لها لكن اعلنها ان انا مسافر ان شاء الله بلا رجعه لأني لا أتحمل آن أراها تهان او تهين أولادها مرغمة
المهم انتم كنزي وزادي في رحلتي منتظر دعواتكم لغاية لما اعرف هابقى ادخل للنت تاني ازاي وهو قريبا ما تخافوش معاكم ولو بقلبي على الاقل ....وهي دي مفاجأتى هههههههههه رخمة صح ؟ هههههههههههههههههههههههه يللا نضحك من اللي بيعملوه فينا او حتى نضحك من انفسنا المهم نضحك كفاية دموع
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الله الله الله
مش هاقول غير الله
الله يخليكي يا وينكي
الله يخليك يا محمد البرلسي (الجحيم هو الحقيقة )
الله يخليك يا باشمهندس محمد الصاوي
الله يخليك يا كل موظف في ساقية الصاوي
الله يخليكي يا سلمى يامتمكنة (على راي عمرو)
الله يخليكي يافيروز ياللي كان عيد ميلادك 23/11
بجد امسية غنائية مالهاش حل واصحاب جمال واغاني مش ممكن يكفي اني اقول لكم ان انا اخدت اكتر من اربع حبيات داينترا لوقف الازمة القلبية من كتر الانبساط والفرح بهذا الجو الرائع شكرا ليكي يا ونكوك على انك عزمتينا على حسابنا هههههه وشكرا لك يا محمد انك شاركتني السهرة بعد الحفلة
شكرا لك ياسلمى على صوتك الحلو واغانيك الرائعه ولو اني عاوز اعرف اسم الاغنية اللي اخر كلمة فيها كلمة ياريت ما بتعمر بيت
واللي ما حضرش الحدث الفني ده فعلا فاته الكتير والكتير من الاستمتاع
ظللت لساعات وساعات اترقب حضورها وقد اطفأت نور بيتي كله الا من ضوء خافت منبعث من مصباح صغير ...
ياله من جو عاطفي يغري أي رجل بان ينفرد باي امرأة وأن يسمعها ارق كلمات الغزل .... ولكن هيهات الفرق كبير
تفقدت نوافذ غرفتي ونوافذ البيت كلها ... نعم اريدها.... انا وهي فقط ...
فرصة زوجتى والاولاد ارسلتهم عند امي ...
الليلة سأنال منها سأنال منها مهما استعصت على ....
لا لا انا متأكد انها لن تقوي الليلة على مقاومتى ... فانا مستعد لها...
نمت جيدا في فترة الظهيرة ... وعندما استيقظت اخذت حمام وكما لم افعل من قبل قمة فالنشاط والهمة ...
ها هي قد اتت وانا مستعد .... معي المضرب لاقتلها لطالما عذبتني وارقت نومي و اقلقت مضجعي ...
نعم كنت انتظر الناموسة لاقتلها ....
وكل من جه وعزاني
ومين اللي تعب نفسه وافتكرني
ومين القريب اللي ماجاني
مين اللي رتب لي ورقي ودفاتري ؟؟؟
ومين اللي لسه فاكر احضاني
ومين اللي عديت علية ولا افتكر انه ينعاني
وبرضه خايف من هجركم
يا ويلي منكم وقلبي بيعاني
نفسي اموت
يااااااااااااه انت وحشة اوي كده ليه
لونك غامق اوي ده طبع ولا ايه
طيب المفروض اعملك ايه ؟
غلبت وتعبت معاكي من كلمة ايه و ليه ؟
الوش مرسومة عليه ضحكة والقلب فيه نار
والدمعه جارية وغطت الانهار
جريت ليك وبيكي ميت مشوار
حزني داخل معبدي سر الاسرار
حرمتيني ابكيلك براحتي
قلقتي نومي وقليتي راحتى
عودتيني على ضحكة بس من الوش مش براحتى
طيب مين ممكن اشكي له براحتى
صدري يا ناس بر حنان
صدري مخنوق يا خلق انا تعبان
ليه لازم اسمع ؟ عاوز اقول ما انا انسان
فاكركم كلكم وحظي منكم ليه النسيان ؟
انتوا اتنين وعلى متفقين
ناس ودنيا على همي متواعدين
والله باكي والكل فرحانين
طيب اروح منكم فين
لا اقدر اعيش من غير ناس
ولا اسيب الدنيا ماهو ده الاساس
النهارده اول ايام عيد الفطر يااااااااااه يعني ايه عيد حد ممكن يقولي ؟؟؟؟؟؟
دعوه عامة من الاخ شربيني مطرب فريق نغم مصري لحضور حفل الفرقة ضمن فاعليات مهرجان
SOS.. بقاعة المؤتمرات بمدينة نصر وسيكون المهرجان يوم مفتوح ونتمنى الحضور وعلى فكرة فريق نغم مصري ده ما لوش حل ولا الشربيني ورفاقه لهم حل نصيحة روحوا شوفوهم وشجعوهم
يوم 24/11/2006
اوعوا تنسوا .... مستنيكم
المكان: المجلس الثقافي البريطاني
192 ش النيل بجوار مسرح البالون
العجوزة – القاهرة
تليفون:3001666
الزمان: يوم الجمعة 12 أكتوبر الساعة التاسعة مساءً بحديقة المجلس
الحدث: فرقة نغم مصري
شربيني –أوزو – عمرو خيري – بيكو – بادز – هاني بدير – شادي شرف – شريف كامل
وأنا هاكون منتظركم بكل الحب وبجد مكان محترم وبيقدم حاجات محترمة وبما أنكم ناس محترمين فانا ادعوكم للحضور وكله آخر احترام هههههههههههههه
الجمعة 6 أكتوبر
موسيقى و غناء شعبي من الدلتا و الصعيد لفرقة النيل للآلات الشعبية بقيادة الفنان عبد الرحمن الشافعي.
السبت 7 أكتوبر
الفنانة الفلسطينية عبير صنصور وفرقتها، أغاني شعبية و حديثة من فلسطين ومصر.
الأحد 8 أكتوبر
الفنانة فيروز كراوية و فرقتها. أغاني عن الحب و الحياة. من أشعار كوثر مصطفى وأحمد حداد.
الثلاثاء 10 أكتوبر
فرقة فلامنكا . موسيقى حديثة تستلهم موسيقى الفلامنكو الأسبانية والموسيقى الشرقية.
الأربعاء 11 أكتوبر
فرقة اسكندريللا. حازم شاهين و رفاقه يقدمون أغاني من التراث المصري والعربي بتوزيعات جديدة.
الخميس 12 أكتوبر
الحفل الأول ل فرقة سما. الأغاني من أشعار طاهر البرنبالي، وألحان حسني عامر.
الجمعة 13 أكتوبر
فرقة الدور الأول. إطلاق الألبوم الجديد للفرقة "قرار إزالة" . مؤلفات موسيقية أصلية للفرقة تمزج الموسيقى الشرقية مع موسيقى الجاز.
السبت 14 أكتوبر
فتحي سلامة وفرقة شرقيات . إطلاق ألبوم "سلطان" و هو أول ألبوم في مصر لهذه الفرقة المعروفة على المستوى الدولي. يقدم فتحي سلامة مؤلفات و ارتجالات تتميز بالنضج و العمق في المزج بين أساليب موسيقية متعددة منها الجاز و الموسيقى الشعبية المصرية و الموسيقى الشرقية التقليدية.
الأحد 15 أكتوبر
فرقة صابون (لبنان). الموسيقي اللبناني الشاب زيد حمدان في فرقته الجديدة مع المغنية الجزائرية كريمة نايت. غناء ، موسيقى الكترونية ، راب..... الحفل الأول للفرقة في مصر.
الثلاثاء 17 أكتوبر
حفل للفنان رياض عبد الجواد والتخت. إطلاق الألبوم الأول للعازف و المؤلف الموسيقي رياض عبد الجواد .مقطوعات موسيقية شرقية للكمان و التخت يقدمها مجموعة من أبرز الموسيقيين المصريين.
الأربعاء 18 أكتوبر
فرقة "مزيكا بس" إطلاق الألبوم الأول لهذه الفرقة الجديدة التي تقدم مؤلفات جديدة و تضم بعض أبرز الموسيقيين المصريين الشبان مثل حازم شاهين (عود) و نوار... (بيانو) و هاني بدير (ايقاع) و غيرهم.
الخميس 19 أكتوبر
"البنت المصرية" حفل للفرقة الأسبانية "ميوزيكا أنتيجوا" بالتعاون مع السفارة الأسبانية بالقاهرة. تقدم الفرقة موسيقى و أغاني شرقية و أندلسية.
الجمعة 20 أكتوبر
حفل للأطفال: مرح مع الفنانة الشابة يافا جويلي و سيرك الأصدقاء
جميع العروض مجانية وتبدأ في تمام الساعة التاسعة مساء
مسرح الجنينة – حديقة الأزهر – طريق صلاح سالم – الدراسة - القاهرة
لمزيد من المعلومات أو لإجراء اللقاءات الصحفية اتصل ب: 3625057
اختاروا وقولوا لي وانا معاكم وشغال اللي عاوز يعزم حد معاه الحفلات مجاناً انا عن نفسي هاجيب معايه المزة بتاعتي ( نعومة )والي عاوز يتقابل قبل الحفلة ونفطر في أي مكان ونطلع بعد كده على الحفلة برضه شغال لاني هاحتفل بعيد ميلاد المزة بتاعتي وانتم طبعا معزومين كلكم ولما هاتشوفوها هاتموتوا فيها اكتر مني
أجمل شيء فالوجود ..وجود صديق
أولاً كل سنة وانتم جميعاً طيبين ..من كل قلبي ...وفعلا انتم كلكم طيبين
وطيبين هنا أنا أعنيها بمعنى الطيبة والحب والتسامح
أقولكم ليه قلت كده بجد أنا حسيت إن أنا بقى لي عزوة جميلة وصحبة حميمة
أمس في الليل جاءتني مكالمة وما كنت لأحلم بها ولا أفكر فيها بهذه الحميمة
ولا الأخوة الخالصة ف الله وهي مكالمة تهنئة بمناسبة رمضان
وكانت من الفنان الحساس الرقيق أخويا وأخوكم اللي افتقدناه جميعاً من فترة وانحرمنا من كتاباته وتعليقاته بسبب انشغاله بزوجته وأولاده لأنهم كانوا عنده في محل عمله في البلد التي يعمل بها وهما تركوه الآن للمدارس هنا في مصر
وهو الفنان الرقيق الأستاذ محمد (زبادي في الخلاط )
وفعلاً هو أسعدني جداً جداً بهذه المكالمة
والتي طالت بجد لدرجة إني أشفقت عليه من تكلفة المكالمة وطلبت منه أكثر من مرة إنه ينهي المكالمة ونتكلم على النت لكنه بمنتهى الكرم والجدعنه أصر إنه يتكلم وفعلاً تكلم كثيراً وأسعدني أكثر إنه كلف نفسه عناء البحث عن رقم تليفوني وكلمني بجد أنا من هنا أحب اشكره جداً من كل قلبي وأنا بأقول الكلام ده علشان تعرفوا جميعاً إن إحنا بجد بقينا أهل و عيلة واللي بيننا هنا مش مجرد كلام وكتابة إنما حب وحب صااااافي جداً ولوجه الله فالأول وفا لأخر ولن أنسى للأخ الجميل الرائع
تامر (بأضرب بالرصاص )
لما اتعمل هاك لجهازي انه أول من كلف خاطره وإتصل بي في البيت ليسأل عن صحة خبر وفاتي وكمان كلابيظو وتمر حنة وكتير لأني مش عاوز أنسى حد بس بجد بجد مش عارف لو الأيام أبعدتني عنكم يا أحب الناس وأعز الناس ممكن تكون الحياة شكلها إيه بدون حبكم ؟؟؟والله العظيم والله العظيم بحبكم كلكم
وشكرا يا محمد وشكرا يا تامر وشكرا كلكم بجد انتم حسستوني إن أنا لي عيلة كبيرة وقريبة من قلبي
بحبكم كلكم
دعوة إفطار للجميع وكل واحد ها يحاسب لنفسه
الفكرة إن أنا ومجموعه من الأخوة البلوجرية على رأي تمرمر هانم تقولش الفواعلية المهم ما علينا عاوزين يوم نتلم فيه كا عائلة واحده شوباب وبنات كبار وصغار (فاهمني يا منجي أنت وعربي ) عاوزين نشوف مكان بجد نفطر فيه سوا ونقضي وقت جميل مع بعض ونتعرف على بعض اكتر بس بشرط ما حدش يتسنكح على حد ولا حد يسوء الهبل على حد يعني اللي عاوز يشرب كوباية شاي يحط تمنها في جيبه قبل ما يجي والفكرة دي مش بتاعتي والله لكن هما مجموعه لذاذ من معانا هنا وهما اللي اقترحوا على وأنا موافق ... المطلوب منكم يا حلوين اقتراح مكان أو اكتر والشكل العام للقصة ونتراسل كلنا على ايميلي وده مجاني مالكوش دعوة بحسابه وهو ynotadv@gmail.com ynotadv@msn.com
... يللا عن ما حد حوش وطبعا يا ريت نتفق بدري علشان لو هانحجز في أي مكان نلاقي مكان محترم بس بشرط يكون يوم حلو ومش ناقصين غلاسة على بعض وطبعا الغلسين عارفين نفسهم طبعا يا اختشي يا حبيبشي مش قاصدك أنت هههههه والحدق يفهم
كل عام وانتم بخير
مين بيحب اللونين دول ؟
أنا كنت بموت فيهم ...
لونين مالهومش حل عندي
كنت باحس فيهم بالبهجة والتفاؤل
والخير والنماء...
نخش فالموضوع أحسن.؟؟؟؟؟ ماشي نخش
الموضوع يا سادة يا كرام انه أنا كنت بأحب جداً اللون البرتقالي
واللون الأخضر
طيب وإيه الجديد يا عم المزاجنجى الله يقلب مزاجك ؟
اكتر ما هو مقلوب و متعكر ؟
خير إرغي يا عم الأمور ...
الموضوع ببساطة أنا أتعقدت من اللونين دول من ساعة ما الهيئة العامة للنظافة وتجميل القاهرة وهي اسم على غير مسمى وكذلك الشركة الخاصة بتاعة النظافة ما جعلت تلك الألوان.. الألوان الرسمية للزى بتاعهم أو بمعنى أدق زي موظفيهم اللي هما الكناسين والزبالين اللي بيمروا على البيوت واللي بينظفوا الشوارع
والموضوع باختصار أنا ببجي لي كل كام يوم شحط لابس برتقالي ويخبط على باب الشقة وعاوز الشاي بتاعه ( وربنا أنا مش فاتح قهوة الله هو استهبال ؟) مش مرة ونخلص لا دول بيبعتوا بعضهم للشقة اللي بتدفع ويتسلوا عليها لغاية ما بقيت قليل ذوق وباطلع لهم العيال يقولوا لهم بابا وماما مش هنا
ونيجي بقى على اللون الأخضر اللي بقى رمز للشحاته في الإشارات وسايبين الوساخة فالأرض ولا هاين عليهم يشيلوها وعاوز ين ياخدوا اللي يطولوه من العربيات وبمنتهى البجاحة والتناحة وقلة الذوق لدرجة انه ممكن يخبط لك على زجاج السيارة علشان تفتح زجاج الباب ويقولك كل سنة وأنت طيب يا سعادة الباشا .. وتلاقي أتنين تلاتة طلعوا منين ما تعرفش وكله عاوز يقولك كل سنة وأنت طيب حاجة أخر قرف وبجد أنا سمعت إنهم بيأجروا البدل دي بمقابل مبلغ محترم 50 جنيه يومياً أمال هما بياخدوا من وراها كام وفا لأخر اسمهم موظفين مش متسولين يعني الشرطة لا تجروء على مطاردتهم ... علشان كده كرهت الأخضر والبرتقالي مين بقى بيحبهم ؟
عاوز أقولكم نكتة أخر نكد !!!!!! نكتة ونكد ؟ مش عجيبة دي ؟؟؟ اسمعوا القصة وبعدين نحكي مع بعض .......
مرة أتنين دخلوا سينما مع بعض ولما قعدوا واحد بيقول للتاني تراهني اضرب الراجل اللي قدامنا ده على قفاه قاله ماشي 10 جنيه لـ10 جنيه فقام قايم صاحبنا ولازق الراجل على قفاه وقاله أهلا أزيك يا حامد ؟؟؟ أتلفت الراجل وقاله أنا مش حامد فقاله أسف وقام واخد الـ10 جنيه من صاحبه ورجع قاله تاني أقوم اضربهولك تاني على قفاه ؟ فقاله 20 جنيه لـ20 جنيه فقام وقام لازق الراجل على قفاه لتاني مرة وقاله أزيك يا حامد ؟؟؟ أتلفت الراجل وقاله إنا مش حامد فقاله أسف أصل شكلك من ورا شبه واحد اسمه حامد المهم خد الـ20 جنيه والراجل زهق من كتر الضرب على قفاه وقام قعد في مكان تاني وصاحبنا أتراهن تاني مع صاحبه انه يضرب نفس الراجل هو هو وعلى قفاه للمرة الثالثة بس بـ50 جنيه لـ50 جنيه قاله موافق وقام رايح مكان ما الراجل قعد وراح هوب لازقه على قفاه وقال بقى أنت يا حامد قاعد هنا وسايبني اضرب فالراجل اللي هناك ده اسمه كلام ده يا حامد ....
النكتة تموت من الضحك لكن لو حصلت فالحقيقة تعملوا إيه لو انتوا مطرح صاحبنا اللي أتسمى غصب عنه باسم حامد ... ادخل فالموضوع أحسن؟؟؟ أحسن الموضوع بإيجاز إن بوش من مده أساء للإسلام والمسلمين وجرايدنا الغراء ووسائل إعلامنا الغير محترمة والوسائل الأمريكية أيضا الغير محترمة قالت إن خطاب السيد بوش أسيئ فهمه والراجل لا يقصد الاهانة لا للإسلام ولا للمسلمين وعدت وكسب الراهن وتاني مرة جم الكلاب بتوع الدنمارك قاموا سبوا الرسول صلى الله عليه وسلم .. وسخنونا وعملنا مقاطعه وهوبا فهمونا أن الرسام الغلبان ما يقصدش وعدت وكسبوا برضه الرهان ورجع بوش قال إن المسلمين فاشيين والجرايد ووسائل الإعلام عندنا قبل عندهم قالت برضه انه خطاب أسيئ فهمه وعدت وكسب الرهان ههههههههههه والله حلوة وأخيرا جه بابا الفاتيكان وشتم وسب في سيدنا محمد وقال انه قرأ الكلام ده لواحد من زماااان أوي وان إحنا برضه أسئنا فهمه طيب يا عم البابا لما هو موضوع سعادتك قريته ما كانش لازم تحسسنا بثقافتك العالية ولا هو الهدف الشتيمة وبس ويرضه نفس الحدوتة تكررت مع الإعلام وان الخطاب أسيئ فهمه وعدت والمعلم كسب الراهن ؟؟؟؟ لحد امتى إحنا هانفضل نتلزق على قفانا على إننا حامد وإحنا مش واخدين بالنا إننا مش حامد ؟؟؟؟؟ سؤال بريء ؟؟؟ وهي دي النكتة النكدية يارب ما تضحكوا عليها لأحسن أنا حاسس إن أنا بقيت حامد .......وفي حد هايلزقني على قفايا
المشروع:
عبارة عن تجميل لأسوار مدارس ومعاهد القاهرة (مبدئياً) ويتم تنفيذه من خلال طلاب المدارس وبإشراف مدرسي التربية الفنية وبعض الفنانين التشكيليين ويتم من خلاله تغير أشكال أسوار المباني التعليمية من المنظر الحالي الغير حضاري والغير لائق بالقيمة والقدسية الخاصة بتلك المباني مم يتناسب وطبيعة تلك الأماكن المقدسة حيث أن الوضع الحالي مشين بكل ما تعنيه الكلمة من معنى فلا يجوز أن نزرع قيمة جمالية في نفس طفل صغير أو طالب مراهق وقد تعودت عينية على صراع الإعلانات الغير منسقة (لا فنيا ولا جمالياً) والمحفزة دائما على عدم الترتيب أو النظام مما يجعله يكتسب صفة الإهمال واللامبالاة حيث انه يجد من القائمين على مدرسته أو معهده عدم الاهتمام بالمبنى على الأقل من الخارج فينعكس عليه هو نفسه ذلك والكارثة انه سيكون من الداخل والخارج أيضا وفي جل حياته حيث سيفقد الانتماء للاماكن والحفاظ عليها مما سيؤثر سلباً على أجيالنا القادمة الآملين فيها أن تكون هي عجلة تقدم هذا البلد ؟
الهدف:
ينقسم هذا المشروع إلى عدة أهداف أساسية منها:-
إيجاد مواهب فنية من الأجيال الصغيرة التي إذا تمت رعايتها سنخلق جيل جديد من المبدعين في مصر كما كنا دائماً أهل الإبداع.
تشجيع وغرس الثقة بالنفس في النشء الصغير للتعبير عن رأيه ورؤيته الفنية لبلده ومكانه حيث أنه سيعرض أعماله الفنية أمام الناس مما يكسر لديه حاجز الخوف من التعبير عن النفس وكذلك تشجيعه في عرض أفكاره.
تجميل وتهذيب المنظر العام للمباني ومن ثم الشوارع الموجود بها تلك المباني ؟
إيجاد فرصة للتعرف على تاريخنا ومآثرنا من خلال مناخ جمالي بعيد عن المناخ التعليمي البحت الذي في الغالب يكون ذو تأثير عكسي للمعرفة (حيث أن الطالب أو المتلقي يريد دائما المعلومة بطريقته الخاصة الغير مفروضة عليه )ومن هنا يأتي الشكل الجمالي ليتحدث عن التاريخ بالشكل الذي سيدفع الكثيرين للاهتمام بتلك الرسومات أو كما أحب أن أسميها الجداريات لأنه من المؤكد سنجد من نحترم موهبته ونتبناها لتساهم في نهضة فنية حضارية مصريه جميلة .
تنمية روح الانتماء حيث أن من قام بمثل هذا العمل سيكون احرص الناس على الحفاظ على المكان من العبث والتلوث والإيعاز للآخرين بذلك أيضاً مما سيجعله سفير لتهذيب نفوس زملاءه الآخرين.
خلق الإحساس بالقيمة الجمالية الخالصة بعيدا عن أي ماديات حيث أن من سيقوم بتلك الأعمال سيشعر بقيمة ما قام به من عمل من خلال تشجيع الآخرين له فلا تكون نظرته للأشياء مادية من الدرجة الأولى بل سيقدر الجمال قبل المال.
شغل وقت الطلاب في فترة الإجازات لان هذا العمل سيتم من خلال العطلة الصيفية للمدارس.
التنفيذ:
يتم تنفيذ تلك الفكرة من خلال تحديد مساحات على أسوار المدارس بحيث سيتم تقسيم كامل السور إلى قطع بطول مثلا 3 أمتار لكل مبدع (دعونا نسميهم مبدعين)أو مجموعة منهم ,من طلاب تلك المدارس أو المعاهد ويتم تحديد نمط فني معين نتحرك من خلاله فنحن لدينا حقول خصبة للحركة فمثلا يمكننا أن نجعل احد الأسوار في منطقة معينة مثل (عين شمس) وهي منطقة زاخرة بالآثار الفرعونية أن تكون الجداريات فيها تتحدث عن تاريخنا الفرعوني بما فيه من ثراء وعظمة ومن خلال تلك الرسومات سنعرف بالتاريخ الفرعوني وكذلك نقيم متحف مفتوح في الشارع لكل من يريد ليرى جداريه جميله وكذلك معلومة عن تلك الجدارية من حيث الشرح لها والتعريف بما فيها من موضوعات والتعريف بمن قام بتنفيذها أيضا لنؤدي له حقه الأدبي.
يتم دهان الأسوار بدهان موحد وليكن اللون الأبيض ليتمكن من سيقوم بتلك الأعمال من استخدام ألوانه كما يحلو له .
سيتم تنفيذ جميع تلك الأعمال بدهانات وألوان البلاستيك لتكون قليلة التكاليف وكذلك لنتمكن من إعادة تغيرها من عام الى عام للتعرف على مبدعين جدد وموضوعات جديدة ورؤية التطور الحادث في تلك الشخصيات المبدعة وأيضا يمكننا الاحتفاظ به لفترة لا تقل عن الـ4 سنوات في الجو الخارجي لان تلك الألوان لها خاصية تحمل الشمس والبرودة أيضا وهذا الأمر أفضل تركه للمتخصصين ولكن فقط اعرض الأمر .
كما يمكننا من خلال هذه الفكرة أن نقوم بتشجير جوار الأسوار ووضع بعض المقاعد مما سيجعل من هذه الفكرة متنفس حقيقي لتذوق الجمال للطلاب وأهالي الحي الذين سيجدوا لديهم فرصة للتعرف على أشياء من الممكن أن يكون فاتهم التعرف عليه أو طوى النسيان صفحاتها في ذاكرتهم .
ختاماً هذه الفكرة ليست الا مساهمة بسيطة ومتواضعة جدا لهذا الوطن الجميل الذي نأمل أن يحيا فيه أبنائنا بعزة ورقى وآمل أن تنال على استحسانكم واستحسان القائمين على العملية التعليمية ولسعادتكم كامل الحرية في عرضها على من تشاء بالشكل الذي تراه مناسب لتنفيذها.
مشروع دورت به على طوب الأرض حد سامعني ؟؟؟؟؟؟
ممكن حد ينفذ ....حبوها والله تستاهل الحب .. انا باحبها من منكم يحبها مثلي انا ؟
