الثلاثاء، سبتمبر ٢٦، ٢٠٠٦

بحبكم كلكم

أجمل شيء فالوجود ..وجود صديق

أولاً كل سنة وانتم جميعاً طيبين ..من كل قلبي ...وفعلا انتم كلكم طيبين

وطيبين هنا أنا أعنيها بمعنى الطيبة والحب والتسامح

أقولكم ليه قلت كده بجد أنا حسيت إن أنا بقى لي عزوة جميلة وصحبة حميمة

أمس في الليل جاءتني مكالمة وما كنت لأحلم بها ولا أفكر فيها بهذه الحميمة

ولا الأخوة الخالصة ف الله وهي مكالمة تهنئة بمناسبة رمضان

وكانت من الفنان الحساس الرقيق أخويا وأخوكم اللي افتقدناه جميعاً من فترة وانحرمنا من كتاباته وتعليقاته بسبب انشغاله بزوجته وأولاده لأنهم كانوا عنده في محل عمله في البلد التي يعمل بها وهما تركوه الآن للمدارس هنا في مصر

وهو الفنان الرقيق الأستاذ محمد (زبادي في الخلاط )

وفعلاً هو أسعدني جداً جداً بهذه المكالمة

والتي طالت بجد لدرجة إني أشفقت عليه من تكلفة المكالمة وطلبت منه أكثر من مرة إنه ينهي المكالمة ونتكلم على النت لكنه بمنتهى الكرم والجدعنه أصر إنه يتكلم وفعلاً تكلم كثيراً وأسعدني أكثر إنه كلف نفسه عناء البحث عن رقم تليفوني وكلمني بجد أنا من هنا أحب اشكره جداً من كل قلبي وأنا بأقول الكلام ده علشان تعرفوا جميعاً إن إحنا بجد بقينا أهل و عيلة واللي بيننا هنا مش مجرد كلام وكتابة إنما حب وحب صااااافي جداً ولوجه الله فالأول وفا لأخر ولن أنسى للأخ الجميل الرائع

تامر (بأضرب بالرصاص )

لما اتعمل هاك لجهازي انه أول من كلف خاطره وإتصل بي في البيت ليسأل عن صحة خبر وفاتي وكمان كلابيظو وتمر حنة وكتير لأني مش عاوز أنسى حد بس بجد بجد مش عارف لو الأيام أبعدتني عنكم يا أحب الناس وأعز الناس ممكن تكون الحياة شكلها إيه بدون حبكم ؟؟؟والله العظيم والله العظيم بحبكم كلكم

وشكرا يا محمد وشكرا يا تامر وشكرا كلكم بجد انتم حسستوني إن أنا لي عيلة كبيرة وقريبة من قلبي

بحبكم كلكم

إعتذار

أعتذر عن التهيسة بتاعه امبارح وإن شاء الله ها نزل لكم الصور تاني على مهلي لانها صور نار نار نار
رمضان كريم والواحد شكله فاصل موسيقي ههههههههكل سنة وانتم طيبين

السبت، سبتمبر ٢٣، ٢٠٠٦

دعوة إفطار للجميع وكل واحد ها يحاسب لنفس

دعوة إفطار للجميع وكل واحد ها يحاسب لنفسه

الفكرة إن أنا ومجموعه من الأخوة البلوجرية على رأي تمرمر هانم تقولش الفواعلية المهم ما علينا عاوزين يوم نتلم فيه كا عائلة واحده شوباب وبنات كبار وصغار (فاهمني يا منجي أنت وعربي ) عاوزين نشوف مكان بجد نفطر فيه سوا ونقضي وقت جميل مع بعض ونتعرف على بعض اكتر بس بشرط ما حدش يتسنكح على حد ولا حد يسوء الهبل على حد يعني اللي عاوز يشرب كوباية شاي يحط تمنها في جيبه قبل ما يجي والفكرة دي مش بتاعتي والله لكن هما مجموعه لذاذ من معانا هنا وهما اللي اقترحوا على وأنا موافق ... المطلوب منكم يا حلوين اقتراح مكان أو اكتر والشكل العام للقصة ونتراسل كلنا على ايميلي وده مجاني مالكوش دعوة بحسابه وهو ynotadv@gmail.com ynotadv@msn.com

... يللا عن ما حد حوش وطبعا يا ريت نتفق بدري علشان لو هانحجز في أي مكان نلاقي مكان محترم بس بشرط يكون يوم حلو ومش ناقصين غلاسة على بعض وطبعا الغلسين عارفين نفسهم طبعا يا اختشي يا حبيبشي مش قاصدك أنت هههههه والحدق يفهم

كل عام وانتم بخير

الخميس، سبتمبر ٢١، ٢٠٠٦

مين بيحب اللونين دول ؟

f

مين بيحب اللونين دول ؟

أنا كنت بموت فيهم ...

لونين مالهومش حل عندي

كنت باحس فيهم بالبهجة والتفاؤل

والخير والنماء...

نخش فالموضوع أحسن.؟؟؟؟؟ ماشي نخش

الموضوع يا سادة يا كرام انه أنا كنت بأحب جداً اللون البرتقالي

واللون الأخضر

طيب وإيه الجديد يا عم المزاجنجى الله يقلب مزاجك ؟

اكتر ما هو مقلوب و متعكر ؟

خير إرغي يا عم الأمور ...

الموضوع ببساطة أنا أتعقدت من اللونين دول من ساعة ما الهيئة العامة للنظافة وتجميل القاهرة وهي اسم على غير مسمى وكذلك الشركة الخاصة بتاعة النظافة ما جعلت تلك الألوان.. الألوان الرسمية للزى بتاعهم أو بمعنى أدق زي موظفيهم اللي هما الكناسين والزبالين اللي بيمروا على البيوت واللي بينظفوا الشوارع

والموضوع باختصار أنا ببجي لي كل كام يوم شحط لابس برتقالي ويخبط على باب الشقة وعاوز الشاي بتاعه ( وربنا أنا مش فاتح قهوة الله هو استهبال ؟) مش مرة ونخلص لا دول بيبعتوا بعضهم للشقة اللي بتدفع ويتسلوا عليها لغاية ما بقيت قليل ذوق وباطلع لهم العيال يقولوا لهم بابا وماما مش هنا

ونيجي بقى على اللون الأخضر اللي بقى رمز للشحاته في الإشارات وسايبين الوساخة فالأرض ولا هاين عليهم يشيلوها وعاوز ين ياخدوا اللي يطولوه من العربيات وبمنتهى البجاحة والتناحة وقلة الذوق لدرجة انه ممكن يخبط لك على زجاج السيارة علشان تفتح زجاج الباب ويقولك كل سنة وأنت طيب يا سعادة الباشا .. وتلاقي أتنين تلاتة طلعوا منين ما تعرفش وكله عاوز يقولك كل سنة وأنت طيب حاجة أخر قرف وبجد أنا سمعت إنهم بيأجروا البدل دي بمقابل مبلغ محترم 50 جنيه يومياً أمال هما بياخدوا من وراها كام وفا لأخر اسمهم موظفين مش متسولين يعني الشرطة لا تجروء على مطاردتهم ... علشان كده كرهت الأخضر والبرتقالي مين بقى بيحبهم ؟

الجمعة، سبتمبر ١٥، ٢٠٠٦

نكتة الموسم

عاوز أقولكم نكتة أخر نكد !!!!!! نكتة ونكد ؟ مش عجيبة دي ؟؟؟ اسمعوا القصة وبعدين نحكي مع بعض .......

مرة أتنين دخلوا سينما مع بعض ولما قعدوا واحد بيقول للتاني تراهني اضرب الراجل اللي قدامنا ده على قفاه قاله ماشي 10 جنيه لـ10 جنيه فقام قايم صاحبنا ولازق الراجل على قفاه وقاله أهلا أزيك يا حامد ؟؟؟ أتلفت الراجل وقاله أنا مش حامد فقاله أسف وقام واخد الـ10 جنيه من صاحبه ورجع قاله تاني أقوم اضربهولك تاني على قفاه ؟ فقاله 20 جنيه لـ20 جنيه فقام وقام لازق الراجل على قفاه لتاني مرة وقاله أزيك يا حامد ؟؟؟ أتلفت الراجل وقاله إنا مش حامد فقاله أسف أصل شكلك من ورا شبه واحد اسمه حامد المهم خد الـ20 جنيه والراجل زهق من كتر الضرب على قفاه وقام قعد في مكان تاني وصاحبنا أتراهن تاني مع صاحبه انه يضرب نفس الراجل هو هو وعلى قفاه للمرة الثالثة بس بـ50 جنيه لـ50 جنيه قاله موافق وقام رايح مكان ما الراجل قعد وراح هوب لازقه على قفاه وقال بقى أنت يا حامد قاعد هنا وسايبني اضرب فالراجل اللي هناك ده اسمه كلام ده يا حامد ....

النكتة تموت من الضحك لكن لو حصلت فالحقيقة تعملوا إيه لو انتوا مطرح صاحبنا اللي أتسمى غصب عنه باسم حامد ... ادخل فالموضوع أحسن؟؟؟ أحسن الموضوع بإيجاز إن بوش من مده أساء للإسلام والمسلمين وجرايدنا الغراء ووسائل إعلامنا الغير محترمة والوسائل الأمريكية أيضا الغير محترمة قالت إن خطاب السيد بوش أسيئ فهمه والراجل لا يقصد الاهانة لا للإسلام ولا للمسلمين وعدت وكسب الراهن وتاني مرة جم الكلاب بتوع الدنمارك قاموا سبوا الرسول صلى الله عليه وسلم .. وسخنونا وعملنا مقاطعه وهوبا فهمونا أن الرسام الغلبان ما يقصدش وعدت وكسبوا برضه الرهان ورجع بوش قال إن المسلمين فاشيين والجرايد ووسائل الإعلام عندنا قبل عندهم قالت برضه انه خطاب أسيئ فهمه وعدت وكسب الرهان ههههههههههه والله حلوة وأخيرا جه بابا الفاتيكان وشتم وسب في سيدنا محمد وقال انه قرأ الكلام ده لواحد من زماااان أوي وان إحنا برضه أسئنا فهمه طيب يا عم البابا لما هو موضوع سعادتك قريته ما كانش لازم تحسسنا بثقافتك العالية ولا هو الهدف الشتيمة وبس ويرضه نفس الحدوتة تكررت مع الإعلام وان الخطاب أسيئ فهمه وعدت والمعلم كسب الراهن ؟؟؟؟ لحد امتى إحنا هانفضل نتلزق على قفانا على إننا حامد وإحنا مش واخدين بالنا إننا مش حامد ؟؟؟؟؟ سؤال بريء ؟؟؟ وهي دي النكتة النكدية يارب ما تضحكوا عليها لأحسن أنا حاسس إن أنا بقيت حامد .......وفي حد هايلزقني على قفايا

الأحد، سبتمبر ١٠، ٢٠٠٦

والله باحبها ونفسي اشوفها عروسة

المشروع:

عبارة عن تجميل لأسوار مدارس ومعاهد القاهرة (مبدئياً) ويتم تنفيذه من خلال طلاب المدارس وبإشراف مدرسي التربية الفنية وبعض الفنانين التشكيليين ويتم من خلاله تغير أشكال أسوار المباني التعليمية من المنظر الحالي الغير حضاري والغير لائق بالقيمة والقدسية الخاصة بتلك المباني مم يتناسب وطبيعة تلك الأماكن المقدسة حيث أن الوضع الحالي مشين بكل ما تعنيه الكلمة من معنى فلا يجوز أن نزرع قيمة جمالية في نفس طفل صغير أو طالب مراهق وقد تعودت عينية على صراع الإعلانات الغير منسقة (لا فنيا ولا جمالياً) والمحفزة دائما على عدم الترتيب أو النظام مما يجعله يكتسب صفة الإهمال واللامبالاة حيث انه يجد من القائمين على مدرسته أو معهده عدم الاهتمام بالمبنى على الأقل من الخارج فينعكس عليه هو نفسه ذلك والكارثة انه سيكون من الداخل والخارج أيضا وفي جل حياته حيث سيفقد الانتماء للاماكن والحفاظ عليها مما سيؤثر سلباً على أجيالنا القادمة الآملين فيها أن تكون هي عجلة تقدم هذا البلد ؟

الهدف:

ينقسم هذا المشروع إلى عدة أهداف أساسية منها:-

* إيجاد مواهب فنية من الأجيال الصغيرة التي إذا تمت رعايتها سنخلق جيل جديد من المبدعين في مصر كما كنا دائماً أهل الإبداع.

* تشجيع وغرس الثقة بالنفس في النشء الصغير للتعبير عن رأيه ورؤيته الفنية لبلده ومكانه حيث أنه سيعرض أعماله الفنية أمام الناس مما يكسر لديه حاجز الخوف من التعبير عن النفس وكذلك تشجيعه في عرض أفكاره.

* تجميل وتهذيب المنظر العام للمباني ومن ثم الشوارع الموجود بها تلك المباني ؟

* إيجاد فرصة للتعرف على تاريخنا ومآثرنا من خلال مناخ جمالي بعيد عن المناخ التعليمي البحت الذي في الغالب يكون ذو تأثير عكسي للمعرفة (حيث أن الطالب أو المتلقي يريد دائما المعلومة بطريقته الخاصة الغير مفروضة عليه )ومن هنا يأتي الشكل الجمالي ليتحدث عن التاريخ بالشكل الذي سيدفع الكثيرين للاهتمام بتلك الرسومات أو كما أحب أن أسميها الجداريات لأنه من المؤكد سنجد من نحترم موهبته ونتبناها لتساهم في نهضة فنية حضارية مصريه جميلة .

* تنمية روح الانتماء حيث أن من قام بمثل هذا العمل سيكون احرص الناس على الحفاظ على المكان من العبث والتلوث والإيعاز للآخرين بذلك أيضاً مما سيجعله سفير لتهذيب نفوس زملاءه الآخرين.

* خلق الإحساس بالقيمة الجمالية الخالصة بعيدا عن أي ماديات حيث أن من سيقوم بتلك الأعمال سيشعر بقيمة ما قام به من عمل من خلال تشجيع الآخرين له فلا تكون نظرته للأشياء مادية من الدرجة الأولى بل سيقدر الجمال قبل المال.

* شغل وقت الطلاب في فترة الإجازات لان هذا العمل سيتم من خلال العطلة الصيفية للمدارس.

التنفيذ:

* يتم تنفيذ تلك الفكرة من خلال تحديد مساحات على أسوار المدارس بحيث سيتم تقسيم كامل السور إلى قطع بطول مثلا 3 أمتار لكل مبدع (دعونا نسميهم مبدعين)أو مجموعة منهم ,من طلاب تلك المدارس أو المعاهد ويتم تحديد نمط فني معين نتحرك من خلاله فنحن لدينا حقول خصبة للحركة فمثلا يمكننا أن نجعل احد الأسوار في منطقة معينة مثل (عين شمس) وهي منطقة زاخرة بالآثار الفرعونية أن تكون الجداريات فيها تتحدث عن تاريخنا الفرعوني بما فيه من ثراء وعظمة ومن خلال تلك الرسومات سنعرف بالتاريخ الفرعوني وكذلك نقيم متحف مفتوح في الشارع لكل من يريد ليرى جداريه جميله وكذلك معلومة عن تلك الجدارية من حيث الشرح لها والتعريف بما فيها من موضوعات والتعريف بمن قام بتنفيذها أيضا لنؤدي له حقه الأدبي.

* يتم دهان الأسوار بدهان موحد وليكن اللون الأبيض ليتمكن من سيقوم بتلك الأعمال من استخدام ألوانه كما يحلو له .

* سيتم تنفيذ جميع تلك الأعمال بدهانات وألوان البلاستيك لتكون قليلة التكاليف وكذلك لنتمكن من إعادة تغيرها من عام الى عام للتعرف على مبدعين جدد وموضوعات جديدة ورؤية التطور الحادث في تلك الشخصيات المبدعة وأيضا يمكننا الاحتفاظ به لفترة لا تقل عن الـ4 سنوات في الجو الخارجي لان تلك الألوان لها خاصية تحمل الشمس والبرودة أيضا وهذا الأمر أفضل تركه للمتخصصين ولكن فقط اعرض الأمر .

* كما يمكننا من خلال هذه الفكرة أن نقوم بتشجير جوار الأسوار ووضع بعض المقاعد مما سيجعل من هذه الفكرة متنفس حقيقي لتذوق الجمال للطلاب وأهالي الحي الذين سيجدوا لديهم فرصة للتعرف على أشياء من الممكن أن يكون فاتهم التعرف عليه أو طوى النسيان صفحاتها في ذاكرتهم .

* ختاماً هذه الفكرة ليست الا مساهمة بسيطة ومتواضعة جدا لهذا الوطن الجميل الذي نأمل أن يحيا فيه أبنائنا بعزة ورقى وآمل أن تنال على استحسانكم واستحسان القائمين على العملية التعليمية ولسعادتكم كامل الحرية في عرضها على من تشاء بالشكل الذي تراه مناسب لتنفيذها.

مشروع دورت به على طوب الأرض حد سامعني ؟؟؟؟؟؟

ممكن حد ينفذ ....حبوها والله تستاهل الحب .. انا باحبها من منكم يحبها مثلي انا ؟

الخميس، سبتمبر ٠٧، ٢٠٠٦

ادي اخرة البعزقة وكل واحد واصله

النهارده هافضفض معاكم من وحي برنامج في الممنوع بتاع مجدي مهنى وكان ضيفه ولمؤاخدة الوزير الفنان/ فاروق حسني اللي استفد أهل أهلي

لما قاله احنا دفعنا (الحكومة يعني ) مبلغ خمستاشر الف جنيه تعويض للفرد من الجماعة بتوع حريق مسرح قصر الثقافة اللي في بني سويف وساعتها افتكرت تمثال رمسيس الل اندفع فيه ستة مليون جنيه ودوغري يا حبايب افتكرت جدي وحكاياته من زماااااان احكي لكم الحدوتة وانتوا قرروا جدي الراجل البسيط كان يقصد مين بالقصة دي ..القصة :

كان زمااااان زمااااااااان اوي راجل فقير وزوجته وابنه الوحيد ومالت عليهم الايام ومرضت الام والاب عجز عن علاجها واضطر لبيع ابنه في سوق المدينة وكان في فالبلد دي ملك روش حبتين ونازل يبعزق له قرشين فعدى على الراجل ده

وسئله: الولد ده للبيع

فقال: نعم يا مولاي

فسئلة الملك: بكام ؟

فقال: 1500 دينار

فقال الملك : لأ 1000 دينار بس

الراجل مزنوق فوافق

الملك : والولد ده يعرف يعمل ايه

الاب الفقير : ابني يفهم في الفراسة كويس ولا عمل اخر لديه

طبعا الملك اشترى ومش هايرجع في كلامه وخد الولد ومشي لقى راجل بيبيع حصان

فسئلة : بكم الحصان

فقال له الرجل 2500 دينار .

فهوب راح دافع من غير ما يكتر مع الراجل واخد الحصان والولد وروح على القصر عاوز يستفيد من الولد

قاله: يعني إيه تفهم في الفراسة

فقال الولد :يعني اتفرس في الاشياء واقولك اصلها وفصلها

الملك قاله جميل شوف لنا اصل الفرس ده

الولد خلى السايس يمشي الفرس قدامه رايح جاي كام مرة

وقال للملك مولاي الحصان ده مهجن مش اصيل

فقاله الملك هاتوا الراجل اللي باع الحصان

وسئله :هل حصانك اصيل ولا هجيت

فقال له بائع الحصان : هجين يا مولاي

الملك سئل الولد عرفت منين؟

قاله من حركة الحصان مش بيرفع راسه وهو ماشي قدر ما بينزلها فده مش عربي ومش معتز بنفسه

فقاله الملك لك عندي مكافأة

وطبعا روق بياع الحصان (هما الملوك كده مفتريين )

قال الملك للولد تعرف تقولي اصل الملكة مراتي؟

فقاله اديني الامان واديني اسبوع وانا اقولك

وبعد اسبوع جه الولد للملك وقاله يا مولاي لي الامان فقاله نعم

قال له الملكة شحاته بنت شحاتين

فقاله الملك غلط دي بنت ملك مملكة كدا اللي جنبنا

فقال له يا مولاي اسئل وانت تعرف راح الملك مستضيف حماه وحماته الملوك وقفل الباب ومسك لهم السيف وقاللهم يا اما الحقيقة يا اما راسكم

فقالوا له نعم احنا شحاتين ومن حوالي 40 سنة مات ملك المملكة اللي بنحكمها الان وكان العرف عندهم انهم اول من يدخل المملكة يصبح ملك عليهم

فجاب الولد وسئله انما انت عرفا لنها بنت شحاتين منين ؟

فقاله يا مولاي كانت بعد ما تخلص اكل تلحس الصحون باصبعها

فقاله لك مكاقأة عظيمة ولك كمان مني الامان تعرف تقولي بعد كام يوم انا اصلي ايه ؟

فقال له يا مولاي اقولك الان

فقال له الملك قول وما تخافش

فقاله يا مولاي انت عديم اصل

فقاله لا عدت منك دي انا ابن الملك فلان والملكة فلانة وجدي الملك فلن وجد جدي الملك فلان ههههاي طلعت اوت

فقال له يا مولاي اسئل تعرف

فراح الملك على ابوه وامه وهددهم بالسيف وسئلهم انا اصلي ايه؟

فقالوا له والله للاسف انت عديم اصل لانك لقيط واحنا ما كناش بنخلف فاخدناك وربيناك علشان نحافظ علة ملكنا وتكون وريثنا لما نعجز زي كده فرجع الملك للولد وقاله افهم انت عرفت ان انا عديم اصل من غير ما تاخد وقت كده ازاي

فقاله يا مولاي اللي يفضل الحيوان على الانسان لازم يكون عديم اصل ....انت دفعت في 1000 دينار وكان صعبان عليك ولما جيت للحصان دفعت 2500 من غير ما تفكر ... اهداء لكل من فضل ان يرحم رمسيس من التلوث وساب ولاد الكلب اللي هما احنا نتلوث لما نموت