مين بيحب اللونين دول ؟
أنا كنت بموت فيهم ...
لونين مالهومش حل عندي
كنت باحس فيهم بالبهجة والتفاؤل
والخير والنماء...
نخش فالموضوع أحسن.؟؟؟؟؟ ماشي نخش
الموضوع يا سادة يا كرام انه أنا كنت بأحب جداً اللون البرتقالي
واللون الأخضر
طيب وإيه الجديد يا عم المزاجنجى الله يقلب مزاجك ؟
اكتر ما هو مقلوب و متعكر ؟
خير إرغي يا عم الأمور ...
الموضوع ببساطة أنا أتعقدت من اللونين دول من ساعة ما الهيئة العامة للنظافة وتجميل القاهرة وهي اسم على غير مسمى وكذلك الشركة الخاصة بتاعة النظافة ما جعلت تلك الألوان.. الألوان الرسمية للزى بتاعهم أو بمعنى أدق زي موظفيهم اللي هما الكناسين والزبالين اللي بيمروا على البيوت واللي بينظفوا الشوارع
والموضوع باختصار أنا ببجي لي كل كام يوم شحط لابس برتقالي ويخبط على باب الشقة وعاوز الشاي بتاعه ( وربنا أنا مش فاتح قهوة الله هو استهبال ؟) مش مرة ونخلص لا دول بيبعتوا بعضهم للشقة اللي بتدفع ويتسلوا عليها لغاية ما بقيت قليل ذوق وباطلع لهم العيال يقولوا لهم بابا وماما مش هنا
ونيجي بقى على اللون الأخضر اللي بقى رمز للشحاته في الإشارات وسايبين الوساخة فالأرض ولا هاين عليهم يشيلوها وعاوز ين ياخدوا اللي يطولوه من العربيات وبمنتهى البجاحة والتناحة وقلة الذوق لدرجة انه ممكن يخبط لك على زجاج السيارة علشان تفتح زجاج الباب ويقولك كل سنة وأنت طيب يا سعادة الباشا .. وتلاقي أتنين تلاتة طلعوا منين ما تعرفش وكله عاوز يقولك كل سنة وأنت طيب حاجة أخر قرف وبجد أنا سمعت إنهم بيأجروا البدل دي بمقابل مبلغ محترم 50 جنيه يومياً أمال هما بياخدوا من وراها كام وفا لأخر اسمهم موظفين مش متسولين يعني الشرطة لا تجروء على مطاردتهم ... علشان كده كرهت الأخضر والبرتقالي مين بقى بيحبهم ؟
هناك ٣٠ تعليقًا:
المزاج العالى
تصدق عندك حق النظافة هى الوسيلة المقنعة للشحاتة
وعمالين ينقلوا الزبالة من جنب لجنب وكل واحد محتكر منطقة بتاعته ممنوع تعدى حد عليها
واللى موجودين منهم على كوبرى اكتوبر دول اسوء نموذج
وطبعا رمضان موسم الشحاتة الهايل
وكمان فى مجموعة شحاتين من نوع تانى اللى بيسنو السكاكين دول فى جامعة الدول اعداد غفيرة ومناظر فظيعة
محدش يبرر السلوك ده بالفقر لانه مش فقر ده انعدام كرامة
لانى مش ممكن انسى مشهد طفل بيبيع مناديل فى اشارة المرور ولما حبيت اديله الفلوس ومش عايزة المناديل والله قال بمنتهى الرجولة وهو لا يتعدى 7 سنين
انا مش بشحت منك انا بشتغل يا تخدى المناديل يا تخدى الفلوس
يعنى مثال فقر فظيع بس كرامة محصلتش مش زى الشحاتين الكبار
تحياتى يا مزاجو العالى
tota
صباح المتابعة انا لسه مخلص الموضوع ده ومفروس اكتر من فرسة واحدة حبيبة قلبي كانت قرفانة من واحد زبالة قعد معاها في الشغل 3 ساعات كانوا ولا تعليقة الكفار
ربنا يكرمك وهي فعلا حاجة مفزعة على الاخر ربنا ينمجينابس عجبني الواد اللي عنده كرامة ده
وكل رمضان وانت قمر كده انما صحيح انت صايمة ولا زي كل سنة ؟؟؟؟؟ سؤال بريء من شاب بريء برضه ههههههههههههه
بخخخ
أنا قلت آجى فى الهس هس و الناس نايمة قبل الزحمة
طب و ربنا فهمتك غلط فى الأول - افتكرتك جبت شورت صوف جديد أخضر على برتقانى لزوم الكسوة الشتوى - ظلمتك ييا مسكين و انت على فيض الكريم
ظاهرة زبالة و تقرف و تكسف و كأن مفيش حاجة اسمها انضباط فى الشارع
لاحظ كده فى الأشارات تلاقى الزبالين واقفين عاليمين و أول مالأشارة تقفل : هجووووووم لدرجة ان العيال معايا بيخافوا
و يا نباهتهم لما بيكون واحد وجنبه مزه و يحرجوه : ربنا يخليلك الست - طبعا لو مراته معروف الرد هيكون ايه ولو لسه مستجده لازم يوجب معاهم عشان تعرف انو فييس و كريم.
بقولك ايه يامزاجو : طلب فى الأستخبس متعرفش ألاقى فين بدله حربمى برتقانى مقاس ميديام؟ و واحدة خضره للواد الصغير
أستاذي الكريم
مدونتك رائعة و أسلوبك أروع
إلى الأمام دوما
و شكرا على زيارتك لمدونتي المتواضعة
أخوك
رجل مثلي
GayofSun
انا ما بحبهومش من الاول
يا عم البراءة
انت هتقولى براءة ؟ مينين دى جت فى الليلة دى
براءة دى تتقال فى امن الدولة ومش هتستمر عليها كتيييير كمان
مش عليه يا عمو
هصوم امال انت عارف حالة الجفاف اللى انا عايشة فيها والصيام حلو فى الحالات دى مش بيفرق كتير يعنى عن الفطار
كل سنة وانت طيب ياعم المزاج كله ودايما فى صحة وعافية ودايما معانا بكلامك الجميل ده
تحياتى
تمر مر هانم ربنا يوسع علينا وعليكي برضه انا بتاع شورتات وحياتك يا غالية انا طلعت الحاجات دي من الخدمة من يجي 18 سنة و بيني وبينك بالنوسبة لمقاس البدل فهو موجود بس هاتقيسي كده فالبلوج قدام الخلق
وكل سنة وانت طيبة يا ماماتي
GayofSun
يا عزيزي تسلم لي ويسلم لي ردك وشكرا على الزيارة بس عاوز اقولك انت موتني من الضحك لما قريت موضوع نظافة شقة الجيران وعموما تعيش وتاخد غيرها وشكرا على الزيارة مرة تانية ومرحبا بك دايما اكيد مش هاتحرمنا من زياراتك
LAMIA MAHMOUD
..... يا شيخة ؟
tota
عارفة انك اجمل توتا على احلى شجرة بس للاسف الجفاف اللي انت عايشة فيه هايخليكي تصومي مجبره كل سنة وانت مجبرة ههههههههههه
الغـــــــــــــريب
ما عنديش ........... رد
هههههههههههههههه وانت بالصحة والسلامة
تحياتي ولحد عندكم جي اقول
بمناسبة الشهر الكريم كل عام وانتم والأسرة الكريمة وكل الأصدقاء والأحباب بالخير ومصرنا الحبيبة كلها بالخير واليمن والبركات
كل عام و إنت بألف خير
رمضان كريم
GayofSun
وانت بالصحه والسلامة
وجميع من بطرفكم
زيجو غير الوانك مالهم الفوشيا و الموف اصلا الوان استايل
تخيل مره و انا في الاعدادي كان عندنا يوم مفتوح و كل واحد يلبس ترينج سوت خارجي ماما الله يسهلها لابستني ترينج و الله العظيم حصل برتقالي في اخضر و العيال في الفصل لعبنا لعبه كده و الي بيخسر بيحكموا عليه قوم ايه حكمو عليه الم الزباله الي في الفصل و كان يوم نكد و روحت رميت الزفت الي كنت لابساه العيال المفتريه كانو ناويين من الاول انا ام العيال احب لم الزباله قوي
العيال مستنياك على الفطار تيجي معنا على شرط اصل احنا مقضينها ماماو حماتي و موائد رحمن
بتقول خمسين جنيه في اليوم
يعني 1500جنيه غير الالبدلات و الحوافز و الاعياد
وكل سنه وانت طيب
و الشاي
و السلم يابيه
و الزباله يا ست
طيب
و النبي ماعندهم وظيفه فاضيه
يا عم المزاجنجى إنت فى مصر ياعنى كل الكريكاتير اللى بتحكيه ده يتصدق
فكبر دماغك بس
بص يا سيدى
يمكن اللى هاقوله مايكونش واقعى أو يكون حالم زياده
بس "أعذر و قدر ظروف الناس"
الشباب دول كان ممكن يكونوا فنانين أو علماء أو قاده بجد
بس إحنا مابنحسش بيهم من كترهم
شوف كده أى حد قريب منك كان عنده طموح و بعدين إتصدم فى الواقع فضاع
أنا طبعا عارف إنهم عليهم جزء مش صغير من المسؤليه
بس برده إعذر
و أحلى سلااااااااااام
أم العيال يبقى انت السبب في انهم اختاروا الالوان دي لانه من الواضح انك نضفتي كويس قوي فهم اتباركوا بلون ترنجك ههههههههه
وبعدين عاوز تعزميني على مائدة رحمن منك للي كلت دراع جوزها ليه هو من قلة الموائد نواحينا شكرا يا ختي.... قومي اخطفي جلبيتك وطرحتك السمرا وسرحي العيال وبلاش تحطي لهم جاز وتعالوا انا والله جنبي هنا مائدة ابو العينين ومش بعيد عن مائدة فيفي عبده وحزمنى يا .... رمضان كريم هههههههههههههه
يا مصر اكتب إليكي رسائلي
يا باشا وانت بالف صحة وسلامة وبعودة الايام عليك وعلينا بكل خير تحياتي وشكرا من قلبي على الزيارة
ام العيال
جيتي متاخرة سبقتك تمرمر هانم والواد شلاطة النص ابنها هههههههههههههههه
هيثم محفوظ
تسلم يا فنان وكل عام وانت بخير وعلى فكرة بطلت اكبر دماغي لاني مرة كبرتها ما عرفتش ادخل من الباب ههههههههههههه
كل رمضان وانت جميل وفنان اصيل
محمد أبو الفتوح
كل سنة وانت طيب يا باشا
بس عاوز اقولك لو هما مسنين ولا ذوي عاهات كان ممكن نبلعها بس دي ناس عاوزة تبلطج وللعلم انا والله عندي قلب مش جلف لكن دول عيال متعودة على قلة الكرامة لو الواحد من دول وهو قد الضلفة غار في اي ورشة ولا مصنع ولا مصيبة تاخده كان هايبذل مجهود وممكن كمان يبقى اسطى محترم بس دول ماشين بمثل واطي قوي (.... في .... ولا الشغل فالفاعل )ههههههههههههه وكل سنة وانت طيب يا باشا ما تفطرني بقى عندك يوم ههههههههههه
عمووووووووووووووووووو
أنا كمان محتاجه ينفورم وفوطه صفرا
عاوزه أجمع شوية فلوس فى رمضان
الناس بتبقا طيبه وبعدين لو شفتنى وأنا بعيط هاصعب عليك وهاطلع اللى فى جيبك وتدهونى ولو مطلعتش بقا هافتشك
رمضان كريم يا عم عادل يا مزاجو العنب
Aoossa
منكن اعتذر لك ولو محتاج يونيفورن منكن تكلمي طنطك تمرمر هانم هي منكن تبدل معاكي ويجعله عامر ورمضان كريم
لانها اخدت اخر حتتين كانوا عندي واحد ليها وواحد للواد المقرود ابنها
انا لسه بحب البرتقالي لكن الاخضر غيرت رايي فيه شوية
كراكيب
كل سنة وانت بالف خير انت تعرفي ان انا كنت باموت في البرتقالي لان ده شعار حزبنا حزب الغد بس الجماعة بتوع الزبالة كرهوني فيه للاسف المهم انت عاملة ايه ؟
مش عامله حاجة معزومة على الفطار اول يوم ربنا يبعت عزايم باقي الشهر
اصل الواحد معدش فيه صحة يطبخ 26 سنة بقى صحتى راحت خلاص انا عارفه لما اكمل الثلثين هعمل ايه
كراكيب
كان الله فالعون يا تيتة ولو انك لسه ما دخلتيش دنيا ههههه تفتكري يا كركوبة لو اتجوزتي منكن يتعملك refresh من تاني ؟ونعيد تشغيلك كا نسانة حديد ههه وعلى فكرة انا كنت عامل موضوع عزومة في رمضان بجد بس الناس كلها هيست فيه ههههههههههههههه
ana aslan bakrah ellon el a7'dar fa mesh haklem feh..enma el orange kowes..ya3ne mesh ba7eboh awe..bas 3ade..ana b2a bakrah el sh7aten ele 3amlen feha mowazfen dol..ma2sat el 7dara bgad..
إرسال تعليق