حداد وجاهين

هلت ليالي رمضان ....

ليالي خير وأعياد ....

فاتت ليالي حلوة ....

وجاية ليالي جداد ....

كام يتيم كتب من بعدك ؟؟

يا بو أمين يا حداد ؟

تقولشي ليالي الفرح قلعت لبس الفرح .

ولبست مكانها حداد ؟

تقولشي القسوة عششت فالنفوس ؟

ونسيت يعني ايه وداد .....

مبقاش فقلبي أخضر سواء لبنت او واد ..

كلهم على بعضهم متلونين ...

والناس نسيت انهم مخلوقين من طين ..

الله يرحم كلامك يا عم صلاح يا جاهين ...

لك فالعجب قولة واتنين ...

وبتعرف تخرج الضحكة زي الآهه منا ولانحسش بأنين ...

ياللي كتبتوا بكلامكم ما عشقوه ملايين ....

احنا فذكرى حبكم فاكرينكم ومش ناسين ...

وفكل رمضان بنتسحر معاك يا ابو أمين ....

يا حبة الفؤاد يا فؤاد ومعاك نبع الحب السمين ....

ياخيرة ولاد البلد .. ياصفوة وعماد ووتد .....

ياللي كتبتوا بفنكم ولفنكم .... الذكري هاتفضل لكم ....

ويانا طول السنين

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كتبت الكلام ده تحديدا يوم 27/11/2002 ولأني من عشاق الراحلين الأعاظم فؤاد حداد وصلاح جاهين فحاولت اعبر عن ما بخاطري لهم واللي فكرني بقى بالموضوع ده وطلعته وعملت له إسكان والصورة اللي مع البوست ده إني تقابلت وأنا في أعلى حالات حظي مع بهاء وسامية صلاح جاهين ومحمود حميدة في ندوة (( لازم تعيش المقاومة ))وده كان يوم الاربعاء 19/8/2006 والنهارده 19/8/2006 اتقابلت مع بنت عمنا احمد فؤاد نجم الجميلة نوارة بجد انا محظوظ بيهم وبيكم و كويس إني لاقي حد يسمع لي مع إني حزين من كلام أبو ريشة عن الفراق والله أنا ما عارف اكتب له أقوله إيه بس أنا حاسس إني قلبي بتقطع للكلام اللي قاله ده لأنه إنسان إنسان إنسان من براه ومن جواه وان كان في ضيقه أو كرب فانا أدعو الله العظيم رب العرش العظيم أن يفرج عنا وعنه الهم والغم والحزن وكل المهمومين وان ينالنا بعطفه فهو ارحم الراحمين اللهم ارفع عنا الهم والغم والحزن وردنا إليك ردا جميلا ولا تفرق بين من تحابوا فالله ولله وليس لهم من تحاببهم وتوادهم وتعاطفهم إلا ابتغاك وجهك اللهم أنت القادر والمقدر فقدر لنا جميعا بالخير ولكل من يقرا وآخر دعوانا أن الحمد لله رب العالمين والصلاة والسلام على اشرف المرسلين .....