الاثنين، ديسمبر ١٧، ٢٠٠٧

أعتقد إن أنا عايش تصدقوا !!!!!!

ياااااااااااااااااه نفسي اكتب لكم كلكم نفسي أحضنكم شوية

حاسس إن أنا مش أنا

حاسس إن إنا محتاج لكام أم

محتاج لكام أب

محتاج لكام أخت

محتاج لكام أخ

تفتكروا إن إنا كنت ميت وصحيت ولا إيه الموضوع ؟

الدنيا بقت كده ليه ؟؟؟وبلدنا مش بتحبنا ولا إيه ؟

آه يامه يا بهية

آه يا أمه يا بهية يا أم طرحة وجلابية

يا صبية يا عفية ..

يا خضرة وندية..

يا ساكنة جوه ف قلبي ..

يا مالية نور عينيه ..

أنا بس سبت المكان لكن أنت في الوجدان

دقيت كل البيبان .....

وشميت ريحة الحيطان .....

ما أنا وحشتني ريحة البهارات..

وشكل الشوارع والحارات .....

والدوشة والسُكات..

وجيراني كلهم ....

رجالة و يا ستات ..

خلاص يا أمه مش نافع السُكات..

ما أنا برضه إنسان ..... وقلبي خلاص وجعني .....

طب ودي فيها إيه كمان ..... ؟

تفتكري يا أمه في حد يعيش وحداني.....

دا خصوصاً أنا بالذات .....

ما أنت عارفة أن أنا ماليش غيرك .....

يا سبب عذابي وأشجاني .....

تفتكري ممكن نتقابل تاني ؟؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بجد أنت عاوزاني ؟؟؟؟

والله وأنا كمان.....

مشتاق ليك كتير أوي موت .....

لكن يا غالية خايف للعمر يفوت .....

ما هو صحيح كل نفس دايقة الموت .....

وأيه يسوي في الحياة بعد فراق الأحباب ...

وإيه هاناخد ساعة الموت ؟؟؟

غيرش هو متر صغير فالتراب ...

لكن حاسس إن أنا لو مت هناك عندك ..

ناكر ونكير ها يخففوا عنى العذاب ..

أيوه أكيد ما هو أنا وتراب أصحاب...

تفتكري بجد عوزاني ؟؟؟

طب ليه سيبتيني أروح؟؟

ليه خلعتي الجسد م الروح ؟؟؟

بكيت... والله بجد بكيت..

ما أنت عارفة إن أنا فحضنك إتربيت ..

ما إنت الأهل والولد والبلد والسكن والبيت ...

عارفة أنا عايش إزاي بعيد عنك ؟؟

عايش كده وخلاص...

لا لاقي فيوم حنية ولا شفت في إخلاص ...

تفتكري يامه ليه وصلنا لكده ؟؟؟

والله لا هو مني طمع ولا حتى قلة رضا...

بس إنت أكيد عارفه إن ما حدش في قلبي غيرك ...

وعمري اللي عدي عشته كله بخيرك...

تفتكري ممكن نرجع لبعضنا تانى ؟؟؟

تضمينى تلمينى وتكُفي أحزانى ...

بحبك قوي وبقوة وكل ما ببعد شيئ بيشدنى من جوه

مشتاقلك قوي يا بلادي مشتاق لك قوي يا بهية ....